資深藝人谷峰上月於家中離世 享年94歲
資深藝人谷峰於10號傳出離世消息，終年94歲，據指谷峰係於上月27日，由家人發現佢於寓所中離世，但暫時未有公布死因。
而谷峰逝世嘅消息係由前邵氏男星、現年80歲嘅衛子雲傳出，佢9號於影音平台上載嘅短片中提到谷峰離世嘅消息。片中衛子雲指後悔冇傳授易筋經予谷峰，佢邊抹眼淚邊細訴與對方嘅情誼，指自己小時候於片場認識谷峰，由於當時自己細皮嫩肉相當可愛，加上不時叫對方做谷叔叔，所以谷峰就收咗佢做侄子。
衛子雲指谷峰對自己相當好，當時佢因為想買一把琴，所以就向谷峰借錢，而谷峰亦毫不猶豫借咗畀佢，衛子雲話自己一生人只向谷峰借過錢，所以佢一直感恩到而家。
谷峰原名陳思文，60年代加入邵氏，曾兩度獲得金馬獎最佳男配角。代表作有《倚天屠龍記》、《新獨臂刀》、《籠民》等，不過最令觀眾印象深刻嘅，應該要數喺電影《九品芝麻官》入面，飾演「常威」父親、水師堤水師提督常昆一角。
