音视频：搭便船

音视频：道存堂主 文本：清远山人

文章首发于公号“吴语今说”，作者清远山人，湖州菱湖乡土作家，详见文末。

正文

听吴老师讲起搭便船，想起了弗少往事……

老早，江南个交关(吴方言，很多)古镇，都有东、南、西、北栅，各个栅都有自家个市面，有各自个市河和商业街。

菱湖是个大镇，西栅那边个市面实在是太大了，两条市河隔开太远，分成了大西栅和小西栅，所以，就有了五个“栅“。

菱湖在水乡深处，“无船路勿通“(岸路为河流阻隔，船是当时唯一交通工具)，附近村坊上，家家人家都有船，有个人家大大小小有好几只船，乡民们要出街喫茶，卖菜，买东西，办事体，都会划船或者摇了船，到离伊拉村坊顶近个那个“栅“去，船就停在“栅“里市河靠港的硚口头，桨、橹、船板会放到市河边熟悉个商家屋里，当然，商家也是很欢迎的，那也是商家个揽客之道啊。

出街喫茶，买卖菜蔬，一般用小划船个多，一只小划船，可以坐五六个人，一个人船尾上把艄，一个人船前扳桨，轻快，灵活，速度也快。

如要到镇上买卖大件物品，或载个人较多，就会用摇橹个摇船了，摇船一般可以坐十多个人，大的摇船可坐二十多个人，一个人摇橹，一个人吊绑，船也是很快的，要是前头再加个人扳桨，那船就快得像要飞起来一样介了。

乡民们世世代代出街停船，习惯了，不会停错地方去的，东栅外势(东面一带)村坊上个船，不会停到西栅头去，南路里各村坊上个船，也绝不会停到北栅头去。

镇上个人要到附近哪个村坊上去做客人，或者是去办事体，厌怅(菱湖话，嫌)坐轮船弗方便，要想搭便船过去，就会到相应个那个“栅”个市河边，去打听有没有想去个那个村坊上个船到菱湖来了。

乡民们大都很热情的，会得告诉你 :“ 噢！倷要到毛家圩去啊！刚刚我还看到伊拉(吴方言，他们)村坊上个水根搭了秧毛，还有水花伊拉几个人的，水根介歇(菱湖话，现在)大概还勒杨楼茶馆店里厢介喫茶，尔到茶馆店里去问介一问看，就晓得了。”

问着了，也就搭着便船了。

搭人家便船，坐勒了弗动，要人家化力气载尔，有点难为情的，一般都会得抢了坐到扳桨位置上，相帮伊拉扳扳桨。

乡民看伊是镇上人，也会得搭伊客气个一只，讲 : “倷是伢村坊上客人啊，快点坐坐好么好了，弗要尔动手了。”

自家一个村坊上个人，也是会相互搭搭便船的。

乡村上个人，喜欢相互打听，也喜欢传话，有介一点点小事体，呒没出半个钟头，满个村坊上就会得传遍了。

晓得明朝有人要到菱湖去办事体，旋介(菱湖话，马上)会得传遍全村，正好要想去菱湖有点事体的人，夜快边(菱湖话，傍晚)会提前到伊拉(吴方言，他)屋里厢去问个一声 : “水发啊，倷明朝船上坐得起伐？要坐得起，明朝想搭倷个船，跟牢倷一道到菱湖去，好拉？“

一个村坊上个人，那里会讲得出弗好啊，下趟一个弗巧，自家也话弗出(吴方言，说不定)要搭人家个便船的啊！

再讲了，几个人一道摇船出街，坐勒船上讲讲笑笑，辰光啊过得快介点。

插队格辰光，我也是经常搭了便船进进出出的。

搭便船，在水乡深处个老家菱湖，那真是家常便饭了啊。

小秘籍：吴语今说公号首页回复词典，可直接进入学堂查看吴语各地区的发音及词汇。

作者：清远山人

编辑/排版：莫干山山神

审稿：

作者保留对作品的著作权。未经授权允许，不得擅自转载。

作者简介

清远山人

老家湖州菱湖镇，生于五十年代，挨过饿，插过队，做过工，现寓居澳洲。虽年过半百，但仍然心系吴语，坚持乡土文学创作。现为吴语专栏作家。

苕溪小片顾名思义，主要分布于苕溪流域，具体分布在太湖——钱塘江的广泛地区，包括湖州市本级、吴江西部、长兴、太湖西山、德清(含武康)、安吉(含孝丰)、余杭(含临平)大部分区域、海宁的部分、桐乡(除濮院)。

苕溪小片吴语的多见特色有(为通俗易懂仅用同音字表示)：①“撞”等澄母字读dz-；②农脓糯嫩能瓤6字读l-；③“镯”读“局”；④上声与去声走势相反；⑤仄声走势在阴、阳2调中相同；⑥“旅”读“里”；⑦无普通话“于”的韵母；⑧“收”读“休”或“修”，而不读如“腮”。